 2012 წლის 11 თებერვალს ლოს-ანჯელესში, სასტუმრო "ბევერლი ჰილტონში" გარდაცვლილი უიტნი ჰიუსტონის გვამის გაკვეთის შემდეგ ექსპერტის მოხსენება ამერიკულმა პრესამ "შოკისმომგვრელად" აღიარა.
"უიტნი ჰიუსტონის გვამი სავსე აბაზანაში აღმოაჩინეს. მისი კანის დიდი ნაწილი დამწვარი იყო", - ნათქვამია მოხსენებაში. დოკუმენტების მიხედვით, როცა მომღერლის გვამი აღმოაჩინეს, ტემპერატურა აბაზანაში 33 გრადუსს აღწევდა - ეს უიტნის გარდაცვალებიდან 6 საათის შემდეგ.
"შესაძლოა, ჰიუსტონი ნახევრად უგონო მდგომარეობაში იმყოფებოდა და წყლის ტემპერატურა ვერ განსაზღვრა", - აღნიშნა ლოს-ანჯელესის მთავარმა ექსპერტმა.
მედიკოსების დასკვნაში ნათქვამია, რომ იმ ცხოვრების სტილიდან გამომდინარე, როგორსაც მომღერალი ეწეოდა, სხვა დასასრული მოსალოდნელი არც იყო: კოკაინის ხშირი გამოყენების გამო მისი ცხვირის ნესტოები გაფართოებული იყო.
გაკვეთის შემდეგ მომღერლის სისხლში, კოკაინის გარდა, აღმოჩენილ იქნა მარიხუანას კვალი, ქსანაქსი (ანტიდეპრესანტი), ფლეკსერილი (კუნთოვანი რელაკსანტი) და ბენადრილი (ანტიჰისტამინური საშუალება).
"სავარაუდოდ, ჰიუსტონის სიკვდილი გულის ათეროსკლეროზულმა დაავადებამ და კოკაინის ხშირმა გამოყენებამ გამოიწვია" - ნათქვამია აგრეთვე მოხსენებაში.
აღსანიშნავია, რომ უიტნი ჰიუსტონის სხეულზე აღმოაჩინეს სხვადასხვა ტიპის იარები (ხელებსა და ფეხებზე); ასევე - დაჟეჟილობები მხრებსა და თავზე.
ორი იარა, რომელიც მომღერალს მკერდის ქვეშ აღენიშნებოდა, იმის მანიშნებელია, რომ ჰიუსტონს პლასტიკური ოპერაცია ჰქონდა გაკეთებული მკერდის გასადიდებლად. მედიკოსები აღნიშნავენ, რომ მომღერალს სხეულზე სხვა ქირურგიული ოპერაციების კვალიც აღენიშნებოდა: იარები მუცელსა და ბარძაყებზე, სავარაუდოდ, ლიპოსაქციის ნიშანია.
"ჰიუსტონი აბაზანაში თავზე მჭიდროდ მორგებული პარიკით იწვა. მას მერე, რაც გარდაცვლილ მომღერალს პარიკი მოვხსენით, ვნახეთ, რომ, როგორც ამას სხვა წყაროები აღნიშნავდნენ, უიტნი მელოტი არ ყოფილა.
მას მოკლე, ტალღოვანი შავი თმა ჰქონდა" - აღნიშნა მოხსენებაში ექსპერტმა.
შეგახსენებთ, მილიონობით ადამიანის საყვარელი მომღერალი მშობლიურ შტატში, ნიუ-ჯერსიში დაკრძალეს. ჰიუსტონს ბოლო გზაზე აცილებდნენ ოპრა უინფრი, ალისია კისი, კევინ კოსტნერი, მერაია ქერი, მერი ჯეი ბლაიჯი და სხვა ვარსკვლავები.
ჰიუსტონი გინესის რეკორდების წიგნშია შეყვანილი, როგორც ყველაზე მეტი მუსიკალური ჯილდოს მფლობელი. მათ შორისაა 6 "გრემი", 15 "ბილბორდი", 21 "ემი". მსოფლიო მასშტაბით მისი სიმღერების 170 მილიონი ალბომია გაყიდული, აქედან 55 მილიონი - მხოლოდ აშშ-ში.
|
755
852
16
